التجارة أحسن من الوظيفة نصائح للتجار
*الرأسمال
فالغالب فاش كنسمعوا هاد الكلمة كنحصروها فبزااااف ديال الفلوس ، وهو في الأصل الرأسمال بزااااف ديال الأفكار لي تقدر تخرج منهم حصيصة وخا غير بشوية ديال الفلوس ، وهكدا كدزاد درهم على درهم وكيتكون راسمال ، صحاب گوگل كراو گراج باش بداو ، ومارك سمح فاللباس والخروج باش يجمع فلوس بيسي .
الرأسمال هو الوقت لي كنضيعوه وحنا خايفين من التجربة ، الرأسمال هما دوك لفلوس لي كنضيعوا حيت اليد مثقوبة ، شحال من واحد بدا بمقلة وفيترينة دزاج وولا كينافس صناكات كبار ، حيت عرف أش يقلي فالمقلة ، وعرف يخرج البنة لي ضاعفات ليه قيمة المنتوج ، ومكلفش نفسو عناء التجهيز والديكور ، ومهرسش راسو بفكرة أن راسمالو مكافيش .
*المكان
المكان أو لوكال مهم جدا فأي مشروع ، فإدا كنتي كتفكر تكري محال ، فأنا كنفضل أنك تكريه غالي وفموقع مزيان وسامارش على أنك تقلب على الرخا ويكون الأهم عندك هو الحيوطا آكثر من آش غاتستافد من هاد لحيوطا ، هدا إدا فكرتي تكري .
ولكن الأهم فلوكال هو يكون مناسب لطبيعة الزبناء ، يعني ماشي تكري محال فحي شعبي وتعمروا بالديكورات والفيثرينات والضواو ، وداكشي لي غادي تخسر فهاد المسائل زيدو سلعة ، حيت هكدا كتخلع الكليان ، ودير فبالك أن فالمغرب ، وخصوصا فالمجتمع الشعبي الثمن كيلعب دور كثر من الجودة ، بمعنى قلب على الهوتة ، وادا لقيتي المحال المناسب والمشروع المناسب توكل على الله.
عندك راس مال وضبرتي فالمحال وبديتي تبيع وتشري ، خاصك تعرف ان التجارة فالدم ، وحتى ادا كنتي لا علاقة بالتجارة تبع هاد القواعد ايلا بغيتي تنجح.
القاعدة 1 : الحانوت كيتحل فالصباح ويتسد بليل ، يعني الحلان ماشي على حساب الگانة ، تقدر تحل شي صباح ومتسفالش وتقول صافي نبدا نحل غير لعشية ، لا يا اخي الماتش فيه تسعين دقيقة وتقدر تماركي فالدقيقة 1 ولا فالوقت بدل الضائع ، صبر على رزقك .
القاعدة 2 :الگانة ، ديما كون كول ، ضاحك ناشط ماشط ، وخا يعصبك الكليان ، الإنتصار هو تبيع ليه ماشي تصدرو.
القاعدة 3 : هادي مهمة بزاااف ، حيت بزاف كيغفلوها ، وهي حرك السلعة تباع ، بمعنى نهار تستف ماتبقاش غادي على ديك التستيفة ، لي كانت لفوق هبطها لتحت ولي لتحت طلعها لفوق ولي فشمال ديها ليمين وهي غادا ، وديما تحرك وسط محالك باش يزعم الكليان يدخل لعندك
القاعدة 4 : أول كليان هو لي كيتحكم فنهارك ، بمعنى جا اول كليان حاول تسفال من عندو وخا بلا رباح ، حيت ادا تعكس الاول كيطلع النهار فالصو وبالتجريب ، يعني متحاولش تطلع بيه نهارك سلك معاه باش ما كان المهم بيييع ليه و سفايل من عندو
القاعدة 5 : التعامل ، نتا فالبيع والشرا مكتلعبش على نهار ولا يومين ، هداك راه مشروع حياة ، والكليان كسبوا لديما ماشي تسمر ليه ودير فيها معلم ، ونعطيك هادي وديرها فبالك ، ختار للكليان لي يواتيه باش يشكروا ليه الناس ديك السلعة وهكدا تكسبو وتكسب الناس لي معاه
القاعدة 6 : التأطير ، فالبيع والشرا كاينين جوج انواع ديال الكليان ، كليان لي دايخ وهدا كتقتارح عليه جوج اقتراحات وماتفوتهومش حيت ادا كترتي عليه وهوا دايخ راه مغاديش يشري ، لي داخ كيشد الارض ، وكاين الكليان لي متحمس ، وهدا عطيه بزااااف ديال الإقتراحات ، حيت ولابد غادي يتقدا بلاصة بياسة جوج وبلاصة جوج ثلاتة ، اما ادا كان عندك المليح ، هداك هو ميمونك .،
القاعدة 7 : الخدام، بديتي المشروع التجاري ، وجاب الله التيسير ، وفكرتي دير شي خدام ، كاينين ثلاتة انواع دالخدامة ، نوع كونفيونص ولكن عيان فالبيع والشرا ، ونوع بياع وشراي ولكن ماشي كونفيونص ، والنوع التالت لي هو نادر جدا ، بياع وشراي وكونفيونص ، بما ان النوع الثالث نادر جدا ، فأغلبية التجار كيفضلوا التاني ، غادي تفاجئوا وتقولوا لي واااايلي !
المنطق ديال التجار كيقول ان الخدام لي يدو خفيفة يبيع لك مليون ويدي عشرالاف ، حسن من هداك لي يبيع لك غير عشرالاف وخا مايدي ليك والو .
القاعدة 8 : قاعدة ثلاثية عند الشلوح وكيقولوا فيها "قن ، (كلام فاحش) ، طلق كيخسروا البيع و الشرا " ، قن هي سد بمعنى الحانوت مكيخصوش يتسد بلا ضوابط ، ديما توكل على الله ، الكلام الفاحش هي واحد الكلمة بالشلحة كتعني الفساد ، والتاجر لي مبلي بالبنات عمرو يطفرو ، وطلق راه مفهومة ، بمعنى ممنوع لكريدي والرزق على الله .
القاعدة 9 : الشركة هلكة ، هاد القاعدة خودها من عندي بالتجريب ، عمرك تشارك مع شي حد وخا يكون عندك راسمال قليل ، حيت الوجه المشروك مكيتغسلش ، والرزق لمشروك فيه المشاكيل .
القاعدة 10 : الصولد ، باش تهرب من الصولد يسر فالبيع والشرا ، لي عطاك عطيه ، السلعة موجودة والرزق على الله ، كاين لي كايدير فيها قافز وكيبيع بالثمن وكيفرح ، ولكن ملي كدوز المدة كيلقى راسو غارق فالسلعة لمصولدية لي مجايبة حتا راس مال ، فالوقت لي كان بإمكانو يبيعها بواحد البركة قليلة ديال الرباح.
نصائح من ذهب شكرا بزاف
ردحذف